======================================
و رأيت أن أكتب الرد على هيئة موضوع لان ذلك يستحق .
======================================

هل بما فعلت أسد الباب في وجه من يستفيد و من معلوماتي ؟ .. إن المدونة و لله الحمد باقية و الموضوعات كما هي . فهل الاكتفاء بالرد
على الأخوات بـ(جزاكم الله خيرا) تسد باب العلم و الإستفادة . رغم اني نوهت ان باب النصح مفتوح للتنويه فيما يبدو لي يحتمل الخطأ.
إنما الأعمال بالنيات .. باب النية خصصنا ليه باب كبير و توسعنا فيه لدرجة اننا بنغلبه على الحكم . يعني مثلا مثلا مثلا . لو رجل انفرد بامرأة
في غرفة فدي خلوة محرمة زي ما نص حديث الرسول عليه الصلاة و السلام .. هل ينفع اننا نعلقه بالنية؟ لا بالطبع
فالموضوع هنا برضه . لازم نشوف حكم الدين فيه الأول.
حد هيسألني : هيه دي كمان فيها حكم الدين؟  .. ايوه . كل حاجه في حياتنا فيها حكم الدين الاول .. و زي ما ذكر في الآية الكريمة:
{قُلْ إِنَّ صَلاَتِي وَنُسُكِي وَمَحْيَايَ وَمَمَاتِي لِلّهِ رَبِّ الْعَالَمِينَ}
عمرنا ابدا ما هنتكسف من ديننا و لا نخاف اننا نتهاجم لأن ديننا هو أكمل دين  .. و ده مش صمت في الدفاع عن الدين . ده بيان لحقائق وضعها الدين لان ديننا ما بيشجعش الاختلاط بوجه عام . حتى عند تعلم الدين ليه حدود و ضوابط .. و الأدلة:

من القرآن:

قال تعالى " واذا سألتموهن فاسألوهن من وراء حجاب"
قال تعالى " وقل للمؤمنات يغضضن من أبصارهن ويحفظن فروجهن ولا يبدين زينتهن الا ما ظهر منها "
قال تعالى " ولا يضربن بأرجلهن ليعلم ما يخفين من زينتهن"
قال تعالى " وقرن في بيوتكن ولا تبرجن تبرج الجاهلية الأولى "

و من السنة الشريفة الصحيحة:

قال رسول الله " ألا لا يخلون رجل بامرأة إلا كان ثالثهما الشيطان"رواه أحمد.
وقال رسول الله "المرأة عورة فإذا خرجت استشرفها الشيطان .." رواه الترمذي, (استشرفها يعني زينها في أعين الرجال)
و قال رسول الله " خير صفوف الرجال أولها وشرها آخرها وخير صفوف النساء آخرها وشرها أولها " رواه مسلم.
وقال رسول الله صلى الله عليه وسلم " استأخرن فإنه ليس لكن أن تحققن الطريق عليكن بحافات الطريق " رواه أبو داود.

و مما جاءنا عن فعل الصحابة و الصحابيات و أمهات المؤمنين:

وكان رسول الله صلى الله عليه وسلم إذا سلم قام النساء حين يقضي تسليمه ويمكث هو في مقامه يسيرا قبل أن يقوم قال نرى والله أعلم أن ذلك كان لكي ينصرف النساء قبل أن يدركهن أحد من الرجال " رواه البخاري.
وجعل النبي صلى الله عليه وسلم موضعا للنساء في مصلى العيد ثم أقبل عليهن فوعظهن " رواه البخاري.
و قالت النساء للنبي صلى الله عليه وسلم غلبنا عليك الرجال فاجعل لنا يوما من نفسك فوعدهن يوما لقيهن فيه فوعظهن وأمرهن "رواه البخاري
وكانت عائشة رضي الله عنها تطوف حجرة من الرجال لا تخالطهم - وكانت رضي الله عنها تعلم الرجال من وراء حجاب.

حد هيسألني . و ايه علاقة الاختلاط  بالحوارات في المدونات و المنتديات ؟
هيا هيا يا جماعة الأمرما اختلفش . ده ولد بيتباسط في الحديث مع بنت و ده برضه نفس الشئ.
نحن اخوة و أخوات في الله هذا صحيح . و لكن هل الأخوات في مكانة أختي؟ . لا . لانه يحل ليا اني اتقدم ليهم و ده ما ينفعش مع اختي.
الوضع مختلف .. و للاسف الاخوات بيختلط  عليها الأمر . فكتير منهن بتقابل ابن عمها و ابن خالها من غير حجاب لانه "زي اخوها". مش عارفه للاسف انه ما ينفعش يكون اخوها و انها بتخالف الدين ،، و كتير منهن بتسلم عليهم بايديها و تنسى تحذير الرسول : لأن يطعن في رأس رجل بمخيط من حديد خير له من أن يمس امرأة لا تحل له و تقول الأعمال بالنيات.

أنا مش في نيتي اني اضر اختي . انما فعلي ده بيضرني و يضر اختي .. كل اللي باعمله اني باخلي الحوار جاد بس . و ده ما فيهوش عيب خالص . ده الصح بعينه.

عارف ان الكل بيتهم الفكر ده بالارهاب و التطرف و حبس حرية المرأة .. بس هوه ده الصح و العلاج لكتير من المصايب اللي ابتدت تظهر.

البنت ممكن تتعلم بس تحقق الشروط اللي تطلبها الدين . و ممكن تشتغل بس بنفس الشروط .. مفيش حاجه في ديننا عيب . ده بيحفظ كرامة البنت . و ياما سمعت كتير من شباب . و مالوش في الدين  يقول عبارة " البنت دي مش بتاعت جواز . انا عايز واحدة متدينة".

عايز أقول في النهاية . اني باحاول . باحاول ما اكدبش على نفسي . لاننا فعلا بنكدب على نفسنا و دي اكبر مشكلة لاننا مش بنكدب على نفسنا بس . احنا بيتهيأ لينا اننا بنكدب على ربنا . و ده غير وارد  ،، و يوم ما نقدر نصدق مع نفسنا هنكون زي الزجاج الشفاف جواه زي براه . ودي اول خطوة عشان نكون صادقين مع ربنا .. لكننا عاملين زي الزجاج الفاميه (المعتم) شكله من بره كويس و جذاب. لكن مش عارفين ايه اللي وراه .
مش معنى كلامي اننا نكشف نفسنا و ذنوبنا و عيوبنا .. لا .. بس حاول تقعد مع نفسك ربع ساعة . اسال نفسك و جاوب :

 عايز تكلم بنت . نفسك تتجاذب معاها حوار تتكلم و ترد . و لا عايز منفعة علمية و دينية . عايز تدخل الجنة ولا لأ . و عملت ايه عشان تدخلها. بتحب الرسول و عايز تنفذ اوامره و لا لأ . عايز تسمع اغاني و لا بتدور على حكمها بحق . صدقوني هتلاقوا الاجابة .. بس ما تكدبش على نفسك.

كلنا بنكدب على نفسنا . دي حقيقة .. و الحقيقة المرة اننا بنتخيل اننا ممكن نضحك على ربنا !!

لن أستغرب (إذا كان فيه ردود) انها تهاجم . لان لسه فيه ناس بتتخيل نفسه الصادق الأمين و انه لا ينطبق عليه قول الرسول لأمته ما تركت بعدي فتنة أضر على الرجال من النساء .(البخاري و مسلم).

و السلام عليكم و رحمة الله و بركاته